ବୃତ୍ତି

ପ୍ରାଣୀ ଚିକିତ୍ସକ

ଜଣେ ପ୍ରାଣୀ ଚିକିତ୍ସକ ବିଭିନ୍ନ ପ୍ରକାରର ପଶୁ ପକ୍ଷୀ ଯଥା ଗୃହପାଳିତ ପଶୁ, ଗୋରୁଗାଈ ଏବଂ ବନ୍ୟଜନ୍ତୁଙ୍କ ରୋଗର ନିରୂପଣ, ଚିକିତ୍ସା ଏବଂ ପ୍ରତିରୋଧ କରନ୍ତି। ପଶୁ ପକ୍ଷୀମାନଙ୍କ ସ୍ୱାସ୍ଥ୍ୟ, ଖାଦ୍ୟ ନିରାପତ୍ତା ଏବଂ ଜନସ୍ୱାସ୍ଥ୍ୟ ନିଶ୍ଚିତ କରିବାରେ ସେମାନେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି। ପ୍ରାଣୀ ଚିକିତ୍ସକମାନେ ପଶୁ ସମ୍ପଦର କଲ୍ୟାଣ ଏବଂ ଗ୍ରାମୀଣ ଜୀବିକାରେ ଅବଦାନ ରଖିବା ପାଇଁ ବିଭିନ୍ନ କ୍ଲିନିକ୍, ଫାର୍ମ, ଗବେଷଣା କେନ୍ଦ୍ର ଏବଂ ସରକାରୀ ବିଭାଗରେ କାର୍ଯ୍ୟ କରନ୍ତି।

ଆବଶ୍ୟକ ଦକ୍ଷତା :

• ପ୍ରାଣୀ ଚିକିତ୍ସା ବିଜ୍ଞାନ ସମ୍ବନ୍ଧୀୟ ଜ୍ଞାନ

• ଉତ୍ତମ ଯୋଗାଯୋଗ କିମ୍ବା ଭାବ ବିନିମୟ ଦକ୍ଷତା

• ପ୍ରାଣୀମାନଙ୍କ ପ୍ରତି ସମ୍ବେଦନଶୀଳତା କିମ୍ବା ସହାନୁଭୂତି

• ମିଳିତ ଭାବେ କାର୍ଯ୍ୟ କରିବା (ଦଳଗତ କାର୍ଯ୍ୟ) ଏବଂ ନେତୃତ୍ୱ ନେବାର ଦକ୍ଷତା

ସଫଳତାର କାହାଣୀ

ଓଡ଼ିଶାର ଅନୁଗୁଳ ଜିଲ୍ଲା ତୁଳସୀପାଳ ଗ୍ରାମର ଜଣେ ବିଶିଷ୍ଟ ପଶୁ ଚିକିତ୍ସକ ଡାକ୍ତର ବଳରାମ ସାହୁ, ଗ୍ରାମାଞ୍ଚଳରେ ପ୍ରାଣୀ ସମ୍ପଦର ସ୍ୱାସ୍ଥ୍ୟ ରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଛନ୍ତି। ୧୯୬୨ ମସିହା ଜୁନ୍ ୧୬ ତାରିଖରେ ଜନ୍ମିତ ଶ୍ରୀ ସାହୁ, ପଶୁ ଚିକିତ୍ସା ବିଜ୍ଞାନରେ ଉଚ୍ଚଶିକ୍ଷା ଗ୍ରହଣ କରିବା ସହ 'ଆନିମଲ୍ ଭାଇରୋଲୋଜି' (Animal Virology) ରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ବର୍ତ୍ତମାନ ସେ ଭୁବନେଶ୍ୱରସ୍ଥିତ 'ଓଡ଼ିଶା ଜୈବିକ ଉତ୍ପାଦ ପ୍ରତିଷ୍ଠାନ' (Orissa Biological Products Institute) ରେ ଜଣେ ବୈଜ୍ଞାନିକ ଭାବରେ କାର୍ଯ୍ୟରତ।

୨୦୦୮ ମସିହାରେ, ଡାକ୍ତର ସାହୁ "ପଥେ ପାଠଶାଳା" ନାମକ ଏକ ଅଭିନବ କାର୍ଯ୍ୟକ୍ରମ ଆରମ୍ଭ କରିଥିଲେ। ଏହା ଏକ ଭ୍ରାମ୍ୟମାଣ ଶିକ୍ଷା ଅଭିଯାନ, ଯାହା ଚାଷୀ ଏବଂ ଗ୍ରାମୀଣ ମହିଳାମାନଙ୍କୁ ପଶୁ ସ୍ୱାସ୍ଥ୍ୟସେବା ବିଷୟରେ ଶିକ୍ଷିତ କରିବା ପାଇଁ ପରିକଳ୍ପନା କରାଯାଇଥିଲା। ଗ୍ରାମ ପରିଦର୍ଶନ, ସ୍ଥାନୀୟ ଭାଷାରେ କର୍ମଶାଳା ଏବଂ ଗୀତ ଓ କବିତା ଭଳି ସୃଜନଶୀଳ ପଦ୍ଧତି ମାଧ୍ୟମରେ ସେ ଶିକ୍ଷାଦାନକୁ ସହଜ ଏବଂ ଆକର୍ଷଣୀୟ କରିପାରିଥିଲେ। ତାଙ୍କର ଏହି ପ୍ରଚେଷ୍ଟା ୧ ଲକ୍ଷରୁ ଅଧିକ ଗ୍ରାମବାସୀଙ୍କ ପାଖରେ ପହଞ୍ଚିପାରିଛି, ଯାହା ସେମାନଙ୍କୁ ଗୋରୁଗାଈଙ୍କ ରୋଗ ପରିଚାଳନା ବିଷୟରେ ଅବଗତ କରାଇବା ସହ ସେମାନଙ୍କ ଜୀବିକାରେ ଉନ୍ନତି ଆଣିଛି। ତାଙ୍କର ଏହି ପ୍ରଭାବଶାଳୀ କାର୍ଯ୍ୟ ପାଇଁ ୨୦୧୧ ମସିହାରେ ତାଙ୍କୁ 'ବିଜ୍ଞାନ ଏବଂ ବୈଷୟିକ ଯୋଗାଯୋଗ' (Science and Technology Communication) କ୍ଷେତ୍ରରେ ଜାତୀୟ ପୁରସ୍କାରରେ ସମ୍ମାନିତ କରାଯାଇଥିଲା, ଯାହା ଗ୍ରାମୀଣ ବିକାଶରେ ପଶୁ ଚିକିତ୍ସା ବିଜ୍ଞାନର ଗୁରୁତ୍ୱପୂର୍ଣ୍ଣ ଭୂମିକାକୁ ଦର୍ଶାଉଛି।

ଉତ୍ସ